चालु वर्षमा वैदेशिक लगानी प्रतिवद्धतामा कमी आएको छ।
गत वर्षको यही अवधिको तुलनामा चालु आर्थिक वर्षको पहिलो तीन महिनामा प्रत्यक्ष वैदेशिक लगानी (एफडिआई) प्रतिबद्धता १८ अर्ब ९० करोड रूपैयाँले घटेको छ।
चालु आर्थिक वर्ष २०८३/८४ को साउनदेखि असोजसम्म १६ अर्ब २३ करोड रूपैयाँ बराबरको लगानी प्रतिबद्धता स्वीकृत भएको छ।
गत आर्थिक वर्षको यही अवधिमा ३५ अर्ब १३ करोड रूपैयाँ बराबरको लगानी स्वीकृत भएको थियो।
उद्योग विभागका अनुसार असोजसम्म ४ सय २२ उद्योग दर्ता भएका छन्। ती उद्योगका लागि उक्त लगानी प्रतिबद्धता आएको हो।
असोजमा मात्रै ५ अर्ब १० करोड रूपैयाँ बराबरको वैदेशिक लगानी स्वीकृत भएको छ। यस महिना ९४ उद्योग दर्ता भएका छन्।
तीमध्ये ८८ उद्योग अटोमेटिक रुटबाट दर्ता भएका हुन्।
असोजसम्म दर्ता भएका उद्योगमध्ये ४ सय १० अटोमेटिक रुट र १२ वटा स्वीकृति प्रक्रियाबाट दर्ता भएका छन्।
आकारका आधारमा दर्ता भएका उद्योगमध्ये अधिकांश साना छन्।
कुल ४ सय १७ साना, दुई मझौला र तीन ठूला उद्योग दर्ता भएका छन्।
असोजमा दर्ता भएका सबै ९४ उद्योग साना प्रकृतिका छन्।
क्षेत्रगत रूपमा सूचना प्रविधिमूलक उद्योगको संख्या सबैभन्दा धेरै छ।
असोजसम्म २ सय ५२ सूचना प्रविधिमूलक उद्योग दर्ता भएका छन्।
पर्यटनमूलक १ सय ८, सेवामूलक ३३ र उत्पादनमूलक २५ उद्योग दर्ता भएका छन्।
ऊर्जा र कृषितर्फ दुई-दुई उद्योग दर्ता भएको विभागले जनाएको छ।
लगानी रकमका आधारमा भने पर्यटन क्षेत्रमा सबैभन्दा बढी वैदेशिक लगानी प्रतिबद्धता स्वीकृत भएको छ। यस क्षेत्रमा ६ अर्ब ८ करोड रूपैयाँ लगानी स्वीकृत भएको छ।
ऊर्जा क्षेत्रमा ४ अर्ब र पूर्वाधारमूलक उद्योगमा ३ अर्ब ५७ करोड रूपैयाँ बराबरको लगानी स्वीकृत भएको छ।
उत्पादनमूलक उद्योगमा १ अर्ब ६० करोड र सूचना प्रविधिमूलक उद्योगमा ९२ करोड ८३ लाख रूपैयाँ बराबरको वैदेशिक लगानी प्रतिबद्धता स्वीकृत भएको विभागको तथ्यांक छ।
